ܦܪܽܘܡܝܽܘܢ

ܬܶܫܒܽܘܚܬܳܐ: ܦܐܝ̣ܬܐ ܘܩܽܘܠܳܣ̈ܶܐ ܫܒܺܝ̈ܚܶܐ: ܘܬܰܪ̈ܥܝܳܬܳܐ ܡܨ̈ܰܠܠܳܬܳܐ ܒܦܽܘܡܳܐ ܩܰܕܺܝܫܳܐ ܘܰܡܪܺܝܩܳܐ: ܘܰܒܠܶܫ̈ܳܢܶܐ ܠܐܴ ܡܛܰܘ̈ܫܶܐ: ܘܚܽܘܫ̈ܳܒܶܐ ܠܐܴ ܫܓܺܝ̣̈ܫܶܐ ܘܗܰܘܢܳܐ ܡܦܰܓܕܳܐ ܢܶܫܬܘܶܐ ܚܢܰܢ ܚܰܛܳܝ̈ܶܐ ܕܢܰܣܶܩ ܠܐܱܒܳܐ ܠܐܴ ܡܶܬܕܰܪܟܳܢܳܐ ܘܠܰܒܪܳܐ ܝܰܠܕܳܐ ܡܬܽܘܡܳܝܳܐ ܘܠܐܴ ܡܶܬܰܐܡܪܳܢܳܐ: ܘܰܠܪܽܘܚܳܐ ܩܰܕܺܝܫܳܐ ܓܳܡܽܘܪܳܐ ܘܰܡܫܰܡܠܝܳܢܳܐ ܘܠܐܴ ܡܶܬܦܰܫܩܳܢܳܐ: ܘܺܐܝܬܰܘܗ̱ܝ ܚܰܕ ܐܰܠܳܗܳܐ ܠܐܴ ܡܶܬܥܰܩܒܳܢܳܐ: ܕܠܶܗ ܝܳܐܶܐ ܫܽܘܒܚܳܐ܀

ܣܶܕܪܳܐ

ܢܦܺܝܣܽܘܢܳܟ ܕܶܝܢ ܚܠܳܦܰܝܢ ܘܡܶܛܽܠܳܬܰܢ ܟܽܠܗܽܘܢ ܟܺܐܢ̈ܶܐ ܘܙܰܕܺܝ̈ܩܶܐ ܕܰܦܠܰܚ̣ܘ̱ ܒܟܰܪܡܳܟ ܡܶܬܝܰܕܥܳܢܳܐ ܡܶܢ ܨܰܦܪܳܐ ܠܪܰܡܫܳܐ: ܗܳܒܶܝܠ ܗܰܘ ܡܰܟܺܝܟܳܐ ܕܰܩܛܺܝܠ ܥܰܠ ܣܰܒܪܳܟ: ܢܽܘܚ ܟܺܐܢܳܐ ܘܙܰܕܺܝܩܳܐ ܕܰܫܦ̣ܰܪ ܗ̱ܘܳܐ ܠܐܱܠܳܗܽܘܬܳܟ ܡܰܠܟܺܝܙܕܶܩ ܟܽܘܡܪܳܐ ܪܰܒܳܐ ܕܨܳܪ ܛܽܘܦܣܳܟ ܒܠܰܚܡܳܐ ܐܳܦ ܚܰܡܪܳܐ ܕܩܰܪܶܒ ܗ̱ܘܳܐ: ܐܰܒܪܳܗܳܡ ܐܰܒܳܐ ܕܥܰܡ̱̈ܡܶܐ ܕܰܫܡ̣ܰܥ ܩܳܠܳܟ: ܐܺܝܣܚܳܩ ܕܰܚ̣ܙܳܟ ܒܰܦܟܳܪ̈ܰܘܗ̱ܝ ܘܡܺܝܟܳܐ ܕܒܰܕܶܩ ܥܰܠ ܕܶܢܚܳܟ: ܘܟܽܠܗܽܘܢ ܢܒܺܝ̈ܶܐ ܕܶܐܬܢܰܒܺܝܘ ܥܰܠ ܡܶܐܬܺܝܬܳܟ: ܘܰܫܠܺܝ̈ܚܶܐ ܕܰܐܟ̣ܪܶܙܘ̱ ܣܒܰܪܬܳܟ: ܘܣܳܗ̈ܕܶܐ ܕܶܐܬܩܰܛܰܠܘ̱ ܡܶܛܽܠ ܚܽܘܒܳܟ: ܘܰܡܡܰܪ̈ܝܳܢܶܐ ܕܣܰܝܒ̣ܰܪܘ̱ ܚܰܫ̈ܶܐ ܚܠܳܦܰܝܟ: ܐܶܬܪܰܥܳܐ ܠܰܢ ܡܳܪܝܳܐ ܐܰܠܳܗܳܐ ܐܰܝܟ ܕܶܐܬܪܰܥܺܝܬܳܝܗ̱ܝ ܠܐܱܒܽܘܢ ܐܳܕܳܡ ܪܺܝܫܳܐ ܕܛܽܘ̈ܗܡܶܐ ܘܰܐܒܳܐ ܕܫܰܪ̈ܒܳܬܳܐ: ܟܰܕ ܐܶܡ̣ܰܪܬ ܠܶܗ: ܕܥܰܠ ܕܰܨܒ̣ܰܝܬ ܕܬܶܗܘܶܐ ܐܰܠܳܗܳܐ ܘܰܢܩ̣ܶܦܬ ܠܡܶܠܟܳܐ ܕܒܰܪ̱ܬ ܙܰܘܓܳܟ ܐܰܘܟܺܝܬ ܥܶܕܪܳܐ ܕܺܝܠܳܟ ܒܝܰܕ ܡܶܠܟܶܗ ܕܳܐܟܶܠܩܰܪܨܳܐ ܡܳܪܽܘܕܳܐ: ܡܶܢ ܦܰܪܕܰܝܣܳܐ ܡܰܦܶܩ ܐ̱ܢܳܐ ܠܳܟ: ܘܠܐܱܪܥܳܐ ܕܟܽܘ̈ܒܶܐ ܘܕܰܪܕܪ̈ܶܐ ܡܰܚܶܬ ܐ̱ܢܳܐ ܠܳܟ: ܘܡܶܢ ܒܳܬܰܪ ܢܽܘܗܪܳܐ ܪܰܒܳܐ ܘܣܰܓܺܝܳܐܐ ܢܓܽܘܠܽܘܢ ܪ̈ܰܚܡܰܝ ܥܠܰܝܟ: ܘܡܶܛܽܠܳܬܳܟ ܐܳܕܳܡ ܡܶܢ ܫܡܰܝܳܐ ܠܐܱܪܥܳܐ ܢܳܚܶܬ ܐ̱ܢܳܐ: ܘܡܶܢ ܒܬܽܘܠܬܳܐ ܡܰܪܝܰܡ ܒܚܰܪܰܬ݀ ܙܰܒܢ̈ܶܐ ܦܰܓܪܰܐ ܢܳܣܶܒ ܐ̱ܢܳܐ: ܘܰܐܝܟ ܟܽܠ ܥܽܘ̣̈ܠܺܝܢ ܡܶܬܺܝܠܶܕ ܐ̱ܢܳܐ: ܘܒܰܡܥܰܪܬܳܐ ܒܓܰܘ ܥܰܙܪܽܘܪ̈ܶܐ ܡܶܬܟܪܶܟ ܐ̱ܢܳܐ: ܘܡܶܢ ܡܓܽܘ̈ܫܶܐ ܒܢ̈ܰܝ ܦܳܪܶܣ ܣܶܓܕܬܳܐ ܡܶܬܩܰܪܒܳܐ ܠܺܝ: ܡܶܛܽܠ ܐܳܕܳܡ ܠܰܥܡܳܕܳܐ ܩܳܪܶܒ ܐ̱ܢܳܐ: ܘܡܶܢ ܝܽܘܚܰܢܳܢ ܥܰܒ̣ܕܳܐ ܘܟܳܪܽܘܙܳܐ ܥܳܡܶܕ ܐ̱ܢܳܐ: ܘܺܐܝܕܶܗ ܥܰܠ ܪܺܝܫܝ̱ ܣܳܐܶܡ ܘܰܡܩܰܒܶܠ ܐ̱ܢܳܐ: ܡܶܛܽܠܳܬܳܟ ܐܳܕܳܡ ܠܗܰܝܟܠܐܴ ܕܽܐܘܪܫܠܶܡ ܥܳܐܶܠ ܐ̱ܢܳܐ ܘܥܰܠ ܕܪ̈ܳܥܰܘܗ̱ܝ ܕܣܳܒܳܐ ܫܶܡܥܽܘܢ ܡܶܬܛܥܶܢ ܐ̱ܢܳܐ ܘܡܶܢ ܦܟܳܪ̈ܶܐ ܕܡܰܘܬܳܐ ܠܶܗ ܫܳܪܶܐ ܐ̱ܢܳܐ: ܡܶܛܽܠܳܬܳܟ ܐܳܕܳܡ ܠܩܳܛܢܶܐ ܡܕܺܝܢ̱ܬܳܐ ܕܰܓܠܺܝܠܐܴ ܡܶܙܕܰܡܰܢ ܐ̱ܢܳܐ: ܘܡܰܝ̈ܳܐ ܠܚܰܡܪܳܐ ܛܳܒܳܐ ܡܫܰܚܠܶܦ ܐ̱ܢܳܐ: ܘܰܠܚܰܬܢܳܐ ܘܠܰܙܡܺܝ̈ܢܶܐ ܒܚܰܡܪܳܐ ܛܳܒܳܐ ܡܚܰܕܶܐ ܐ̱ܢܳܐ ܘܡܰܦܨܰܚ ܐ̱ܢܳܐ: ܡܶܛܽܠܳܬܳܟ ܐܳܕܳܡ ܠܡܰܕܒܪܳܐ ܢܳܦܶܩ ܐ̱ܢܳܐ: ܘܨܰܘܡܳܐ ܕܰܐܪܒܥܺܝܢ ܝܰܘ̈ܡܺܝܢ ܠܳܒܶܟ ܐ̱ܢܳܐ ܘܡ̣ܢ ܡܪܰܡܝܳܢܳܐ ܡܶܬܢܰܣܶܐ ܐ̱ܢܳܐ: ܘܠܶܓܝܽܘܢܳܐ ܕܫܺܐܕ̈ܶܐ ܒܝܰܡܳܐ ܡܛܰܒܰܥ ܐ̱ܢܳܐ: ܡܶܛܽܠܳܬܳܟ ܐܳܕܳܡ ܠܐܘܪܫܠܶܡ ܡܕܺܝܢܰܬ ܨܳܠܽܘ̈ܒܶܐ ܥܳܐܶܠ ܐ̱ܢܳܐ: ܘܥܰܠ ܥܺܝܠܐܴ ܒܰܪ ܐܰܬܳܢܳܐ ܡܶܙܕܰܝܰܚ ܐ̱ܢܳܐ: ܘܡܶܢ ܛܠܳܝ̈ܶܐ ܘܫܰܒܪ̈ܶܐ ܙܥܽܘܪ̈ܶܐ ܒܛܰܪ̈ܦܶܐ ܘܰܒܣܰܘ̈ܟܶܐ ܕܙܰܝܬܳܐ ܘܰܕܕܶܩ̈ܠܐܷ ܡܶܬܩܰܠܰܣ ܐ̱ܢܳܐ: ܡܶܛܽܠܳܬܳܟ ܐܳܕܳܡ ܠܚܰܫܳܐ ܩܳܪܶܒ ܐ̱ܢܳܐ: ܘܒܰܦܟܳܪ̈ܶܐ ܡܶܬܶܐܣܰܪ ܐ̱ܢܳܐ: ܘܒܰܦܪ̈ܳܓܶܠܐܷ ܡܶܬܢܰܓܰܕ ܐ̱ܢܳܐ: ܘܟܽܠ ܐܽܘܠܨ̈ܳܢܺܝܢ ܘܪܽܘܩܳܐ ܥܰܡ ܫܽܘܩܳܦ ܦܰܟ̈ܶܐ ܚܠܳܦܰܝܟ ܣܳܒܶܠ ܐ̱ܢܳܐ: ܡܶܛܽܠܳܬܳܟ ܐܳܕܳܡ ܠܰܨܠܺܝܒܳܐ ܡܶܬܥܰܠܐܷ ܐ̱ܢܳܐ: ܘܚܰܠܐܴ ܘܰܡܪܳܪ̈ܶܐ ܛܳܥܶܡ ܐ̱ܢܳܐ: ܘܰܠܩܰܒܪܳܐ ܥܳܐܶܠ ܐ̱ܢܳܐ ܘܡܶܢ ܒܳܬܰܪ ܬܠܳܬܳܐ ܝܰܘ̈ܡܺܝܢ ܩܳܐܶܡ ܐ̱ܢܳܐ ܘܡܶܬܢܰܚܰܡ ܐ̱ܢܳܐ: ܘܥܰܡܝ̱ ܠܰܫܡܰܝܳܐ ܡܰܣܶܩ ܐ̱ܢܳܐ ܠܳܟ: ܘܡܶܢ ܝܰܡܺܝܢܝ̱ ܡܰܘܬܶܒ ܐ̱ܢܳܐ ܠܳܟ: ܘܟܰܕ ܫܡ̣ܰܥ ܐܳܕܳܡ ܗܳܠܶܝܢ ܡܶܢ ܡܳܪܶܗ ܒܚܰܕܽܘܬܳܐ ܪܰܒܬܳܐ ܐܶܡ̣ܪܰ ܡܳܪܝ̱ ܘܐܰܠܳܗܝ̱ ܕܗܳܕܶܐ ܟܽܠܳܗ̇ ܡܕܰܒܪܳܢܽܘܬܳܐ ܡܰܚܝܳܢܺܝܬܳܐ ܝܰܗ̣ܒܬ ܠܓܶܢܣܳܐ ܬܰܚܽܘܒܳܐ ܒܳܥܶܐ ܐ̱ܢܳܐ ܡܳܪܝ̱ ܡܶܢ ܛܰܝܒܽܘܬܳܟ ܕܰܬܚܽܘܣ ܥܠܰܝ ܘܥܰܠ ܝܰܠܕ̈ܰܝ: ܘܠܐܴ ܬܶܦܪܥܰܢܝ̱ ܐܰܝܟ ܕܫܳܘܶܐ ܐ̱ܢܳܐ ܕܨܰܠܡܳܟ ܐܝ̣ܬܝ ܐܶܬܪܰܚܰܡܥܠܰܝ: ܘܰܚܢܰܢ ܡܚܺܝ̣̈ܠܐܷ ܘܥܰܦܪ̈ܳܢܶܐ ܝܰܠܕ̈ܰܘܗ̱ܝ ܕܒܰܩܝܳܡܬܳܟ ܐܰܩܺܝܡܬ ܠܰܢ ܡܶܢ ܡܰܦܽܘܠܬܰܢ ܘܚܰܣܺܝܬ ܠܰܢ ܚܰܘ̈ܒܰܝܢ ܘܰܚܛܳܗܰܝ̈ܢ ܒܰܡܪܰܚܡܳܢܽܘܬܳܟ ܐܰܝܟܰܢܳܐ ܕܥܰܠ ܐܰܦ̈ܰܝ ܟܽܠܗܶܝܢ ܬܡܺܝܗ̈ܳܬܳܟ ܫܽܘܒܚܳܐ ܘܪܽܘܡܪܳܡܳܐ ܘܩܽܘܒܳܠܛܰܝܒܽܘܬܳܐ ܢܰܣܶܩ ܠܳܟ ܒܝܰܘܡܳܐ ܕܰܩܝܳܡܬܳܟ: ܘܠܐܱܒܽܘܟ ܡܒܰܪܟܳܐ ܘܛܽܘܒܬܳܢܳܐ ܕܫܰܠܚܳܟ ܠܦܽܘܪܩܳܢܰܢ: ܘܰܠܪܽܘܚܳܟ ܚܰܝܳܐ ܘܩܰܕܺܝܫܳܐ ܗܳܫܳܐ ܘܰܒܟܽܠܙܒܰܢ ܠܥܳܠܡܝ̣ܢ܀

ܥܶܛܪܳܐ

ܡܳܪܝܳܐ ܐܰܠܳܗܳܐ ܥܒܶܕ ܪܽܘܡܪܳܡܳܐ ܘܕܽܘܟܪܳܢܳܐ ܛܳܒܳܐ ܠܥܰܢܺܝ̈ܕܶܐ ܡܗܰܝ̈ܡܢܶܐ: ܕܰܫܟ̣ܶܒܘ̱ ܥܰܠ ܣܰܒܪܳܟ ܒܗܰܝܡܳܢܽܘܬܳܐ ܕܰܫܪܳܪܳܐ: ܒܝܰܕ ܥܶܛܪܳܐ ܗܳܢܳܐ ܕܒܶܣ̈ܡܶܐ ܕܩܰܪܶܒܢܰܢ ܠܳܟ ܝܰܘܡܳܢܳܐ: ܘܰܐܝܟ ܕܰܐܫܘܺܝܬܳܢ ܕܰܢܥܰܕܥܶܕ ܩܕܳܡܰܝܟ ܥ̱ܽܘܗܕܳܢܳܐ ܕܰܩܝܳܡܬܳܟ ܐܰܫܘܳܐ ܠܰܢ ܕܢܶܥܽܘܠ ܠܰܓܢܽܘܢܳܟ ܘܢܶܦܽܘܩ ܠܐܘ̣ܪܥܳܟ ܒܡܶܐܬܺܝܬܳܟ ܕܬܰܪܬܶܝܢ: ܘܢܰܣܶܩ ܠܳܟ ܫܽܘܒܚܳܐ ܘܬܰܘܕܺܝܬܳܐ ܘܠܐܱܒܽܘܟ ܘܰܠܪܽܘܚܳܟ ܩܰܕܺܝܫܳܐ܀