ܦܪܽܘܡܝܽܘܢ

ܬܶܫܒܽܘܚܬܳܐ: ܠܗܰܘ ܪܳܡܳܐ ܘܰܡܥܰܠܝܳܐ ܕܶܐܬܬܰܚܬܺܝ ܒܨܶܒܝܳܢܶܗ ܠܣܽܘܪܳܩܳܐ ܐ̱ܢܳܫܳܝܳܐ: ܠܗܰܘ ܓܰܐܝܳܐ ܘܓܰܢ̱ܒܳܪܳܐ ܕܰܫܒ̣ܰܩ ܡܰܪܟܰܒܬܳܐ ܕܰܟܪ̈ܽܘܒܶܐ ܘܩܰܒܠܶ ܥܠܰܘܗ̱ܝ ܝܺܠܺܝܕܽܘܬܳܐ ܐ̱ܢܳܫܳܝܬܳܐ ܒܰܡܪܰܚܡܳܢܽܘܬܶܗ: ܘܰܣܒ̣ܰܠ ܚܰܫ̈ܶܐ ܘܡܰܘܬܳܐ ܘܰܙܩܺܝܦܳܐ ܒܛܰܝܒܽܘܬܶܗ ܕܰܢܥܰܠܶܝܢ ܠܐܱܬܪܳܐ ܩܰܕܡܳܝܳܐ ܕܒܰܥܒܳܪ ܦܽܘܩܕܳܢܳܐ ܡܶܢܶܗ ܐܶܬܛܪܶܕܢܰܢ: ܛܳܒܳܐ ܕܠܶܗ ܢܶܬܕܟܰܪ ܘܠܶܗ ܢܫܰܒܰܚ ܒܗܳܢܳܐ ܥܶܕܳܢܳܐ܀

ܣܶܕܪܳܐ

ܠܳܟ ܬܶܫܒܽܘܚܬܳܐ ܘܠܳܟ ܬܰܘܕܺܝܬܳܐ ܘܺܐܝܩܳܪܳܐ ܘܣܶܓܕܬܳܐ: ܡܳܪܳܐ ܕܰܫܡܰܝ̈ܳܢܶܐ ܘܕܰܐܪ̈ܥܳܢܳܝܶܐ ܗܰܘ ܕܰܒܪܶܚܡܰܬ݀ ܐ̱ܢܳܫܽܘܬܳܟ ܡܶܢ ܡܪܰܘܡܳܐ ܕܰܐܒܽܘܟ ܠܘܳܬܰܢ ܐܶܬܬܰܚܬܺܝܬ: ܕܠܰܢ ܬܶܦܪܽܘܩ ܡܶܢ ܐܺܝ̈ܕܰܝ ܒܺܝܫܳܐ ܘܡܰܘܬܳܐ ܘܣܳܛܳܢܳܐ: ܘܦܰܓܪܳܐ ܐ̱ܢܳܫܳܝܳܐ ܐܶܬܥܰܛܰܦ̣ܬ ܘܒܶܗ ܙܟ̣ܰܝܬ ܠܗܰܘ ܕܰܙܟ̣ܳܐ ܠܐܴܕܳܡ ܒܶܝܬ ܐܺܝܠܳܢ̈ܶܐ: ܘܩܰܒ̣ܶܠܬ ܥܠܰܝܟ ܟܽܠܳܗ̇ ܡܕܰܒܪܳܢܽܘܬܳܐ ܕܰܚܠܳܦܰܝܢ ܕܒܰܒܣܰܪ: ܐܰܝܟܰܢܳܐ ܕܠܰܢ ܬܚܰܪܰܪ ܡܶܢ ܐܺܝ̈ܕܰܝ ܡܳܪܽܘܕܳܐ: ܘܥܰܠ ܗܳܕܶܐ ܡܳܪܝܳܐ ܣܰܓܺܝ ܪ̈ܰܚܡܶܐ ܡܫܰܒܚܺܝܢܰܢ ܠܳܟ: ܘܡܰܘܕܶܝܢܰܢ ܠܣܽܘܪܳܩܳܟ ܘܣܳܓܕܺܝܢܰܢ ܠܐܱܠܳܗܽܘܬܳܟ: ܡܩܰܠܣܺܝܢܰܢ ܠܡܽܘܟܳܟܳܟ: ܘܰܡܪܰܡܪܡܺܝܢܰܢ ܠܪܰܒܽܘܬܳܟ: ܘܬܳܗܪܺܝܢܰܢ ܒܐܢܳܫܽܘܬܳܟ ܡܰܠܝܰܬ݀ ܬܶܗܪܳܐ: ܘܰܡܫܰܒܚܺܝܢܰܢ ܠܛܳܒܽܘܬܳܟ: ܬܳܡܗܺܝܢܰܢ ܒܰܡܕܰܒܪܳܢܽܘܬܟ: ܡܒܰܪܟܺܝܢܰܢ ܠܚܰܫܰܝ̈ܟ ܡܝܰܩܪܺܝܢܰܢ ܠܰܨܠܺܝܒܽܘܬܳܟ: ܡܰܘܕܶܝܢܰܢ ܒܰܩܒܽܘܪܬܳܟ: ܡܗܰܝܡܢܺܝܢܰܢ ܒܰܩܝܳܡܬܳܟ ܡܰܘܪܒܺܝܢܰܢ ܠܣܽܘܠܳܩܳܟ: ܡܗܰܕܪܺܝܢܰܢ ܠܪܽܘܡܪܳܡܳܟ: ܘܫܳܐܠܺܝܢܰܢ ܘܒܳܥܶܝܢܰܢ ܡܶܢܳܟ ܕܰܠܥܶܛܪܳܐ ܗܳܢܳܐ ܕܒܶܣ̈ܡܶܐ ܕܩܰܪܶܒܢܰܢ ܬܩܰܒܶܠ ܒܛܰܝܒܽܘܬܳܟ: ܐܰܝܟܰܢܳܐ ܕܒܺܝܠܺܝܕܽܘܬܳܟ ܚܰܕ̈ܬܶܐ ܡܶܢ ܕܪܺܝܫ ܬܶܒܪܶܐ ܠܰܢ: ܐܦ ܒܰܥܡܳܕܳܟ ܬܕܰܟܶܐ ܠܰܢ: ܘܰܒܝܰܕ ܣܚܳܬܳܟ ܬܚܰܠܶܠ ܠܰܢ ܘܬܶܡܪܽܘܩ ܠܰܢ: ܘܰܒܨܰܘܡܳܟ ܬܩܰܕܶܫ ܠܰܢ: ܘܰܒܢܶܣܝܳܢܳܟ ܕܡܶܢ ܒܺܝܫܳܐ ܬܙܰܟܶܐ ܠܰܢ: ܘܠܐܘ̣ܪܥܳܐ ܕܡܶܐܬܺܝܬܳܟ ܒܽܐܘ̈ܫܰܥܢܶܐ ܬܛܰܝܶܒ ܠܰܢ: ܘܒܰܫܝܳܓܬܳܐ ܕܰܚܛܳܗܰܝ̈ܢ ܚܰܕܳܐ ܠܰܢ ܘܰܒܦܶܨܚܳܐ ܕܐ̱ܪ̈ܳܙܰܝܟ ܐܰܦܨܰܚ ܠܰܢ: ܘܰܒܚܰܫܰܝ̈ܟ ܩܰܕܺܝ̈ܫܶܐ ܚܰܪܰܪ ܠܰܢ: ܘܒܰܨܠܺܝܒܳܟ ܙܰܟܳܝܳܐ ܢܰܛܰܪ ܠܰܢ: ܘܰܒܡܰܘܬܳܟ ܡܰܥܒܶܕ ܚܰܝ̈ܶܐ ܐܰܚܳܐ ܠܰܢ ܘܒܰܩܝܳܡܬܳܟ ܦܳܪܽܘܩܳܝܬܳܐ ܐܰܩܺܝܡ ܠܰܢ: ܘܰܒܣܽܘܠܳܩܳܟ ܕܰܠܘܳܬ ܐܰܒܽܘܟ ܐܰܣܶܩ ܠܰܢ ܘܰܒܡܰܚܰܬܬܶܗ ܕܪܽܘܚܳܐ ܩܰܕܺܝܫܳܐ ܚܰܟܶܡ ܠܰܢ: ܘܰܠܟܽܠ ܗܽܘܠܐܴ ܕܰܚܛܳܗܰܝ̈ܢ ܐܰܘܩܶܕ ܘܛܰܠܶܩ ܡܶܢܢ: ܘܰܒܝܽܘܡ ܡܶܐܬܺܝܬܳܟ ܕܬܰܪܬܶܝܢ ܐܶܬܕܰܟܪܰܝܢ ܘܰܒܓܰܒܳܐ ܕܝܰܡܺܝܢܳܟ ܣܕܽܘܪ ܠܰܢ: ܘܰܒܚܰܓܳܐ ܕܩܰܕܺܝ̈ܫܰܝܟ ܚܠܽܘܛ ܠܰܢ ܘܰܒܢܽܘܗܪܳܟ ܕܰܠܥܳܠܰܡ ܒܰܣܶܡ ܠܰܢ: ܘܒܰܚܙܳܬܳܐ ܕܥܰܢܺܝ̈ܕܰܝܢ ܐܰܪܘܶܙ ܠܰܢ: ܘܠܰܢܝܳܚܬܳܐ ܛܳܒܬܳܐ ܡܰܢܰܥ ܠܰܢ: ܘܥܰܡ ܟܽܠܗܽܘܢ ܐܰܒܳܗܰܝ̈ܢ ܘܰܐܚܰܝ̈ܢ ܘܪ̈ܰܒܳܢܰܝܢ: ܢܰܣܶܩ ܠܳܟ ܫܽܘܒܚܳܐ ܘܬܰܘܕܺܝܬܳܐ ܘܠܐܱܒܽܘܟ ܘܰܠܪܽܘܚܳܟ ܩܰܕܺܝܫܳܐ܀